Lúxusvín mánaðarins í júní 2026
Lúxusvín mánaðarins í júní 2026 Allouchery-Perseval Tradition Blanc de Noirs Extra Brut
Víngerðarmaðurinn Emilien Allouchery er uppalinn á vínekrum fjölskyldu sinnar við þorpið Écueil, rétt utan við borgina Reims. Hann lærði víngerðarfræði í Champagne og Bourgogne, en hélt síðan til Nýja-Sjálands og Suður-Afríku þar sem hann aflaði sér meiri þekkingar og reynslu í víngerð. Hann tók svo við fjölskyldufyrirtækinu árið 2006 og hefur séð um það síðan.
Þorpið Écueil er í vesturhluta Montagne de Reims og vínekrurnar við Écueil eru flokkaðar sem Premier Cru. Þarna eru einkum ræktað Pinot Noir, en Chardonnay og Meunier í minna magni. Vínekrur Allouchery-Perseval liggja í hlíðum og miðhlíðum umhverfis þorpið þar sem kalkríkur leirjarðvegur og sandur skapa góð skilyrði fyrir þrúgurnar og gefa vínunum bæði ferskleika og byggingu.
Lúxusvín mánaðarins kallast Tradition Blanc de Noirs Extra Brut. Eins og nafnið gefur til kynna er vínið eingöngu gert úr Pinot Noir-þrúgum, en kampavínið sjálft er hvítt. Grunnur vínsins er uppskeran 2023 en jafnframt fara um 40% varavína í blönduna sem stuðla að aukinni dýpt og stöðugleika milli ára.
Þrúgurnar eru handtíndar og pressaðar í loftknúinni pressu. Bæði alkóhólgerjun og malólaktísk gerjun fara fram í hitastýrðum stáltönkum sem varðveita ferskleika og ávaxtaeinkenni Pinot Noir. Að lokinni blöndun og flöskun fær vínið að þroskast í að minnsta kosti tvö ár í kjöllurum hússins áður en botnfallið er fjarlægt og flöskurnar tilbúnar til sölu. Þessi þroskunartími gefur víninu meiri fágun og flóknari ilm- og bragðeinkenni.
Viðbætt sykurmagn í víninu er aðeins 3,5 g/L og vínið flokkast því sem Extra Brut. Niðurstaðan er þurrt og fágað kampavín þar sem ferskleiki, ávöxtur og steinefni njóta sín vel.
Vínið nýtur sín vel sem fordrykkur en hentar einnig með forréttum, sjávarréttum og léttum kjötréttum. Við mælum sérstaklega með að prófa það með hörpuskel, smjörsteiktum hvítfiski eða reyktum laxi.
Allouchery-Perseval Tradition Blanc de Noirs
Pönnusteiktur lax með sítrus- og engifersósu
Innihald:
- 800 g beinhreinsuð og roðflett laxaflök
- hveiti
- olía til steikingar
- salt og pipar
Sósa:
- 1/2 laukur, fínt saxaður
- 1 tsk engifer, fínt saxað
- safi úr 1 sítrónu
- safi úr 2 greipaldingum
- safi úr 2 appelsínum
- 3 dl rjómi
- 100 g smjör
- salt og pipar
Aðferð:
- Skiptið laxaflökunum í fjóra bita. Veltið þeim upp úr hveitinu, hristið laust hveiti af og brúnið bitana í olíunni á öllum hliðum. Stráið salti og pipar yfir og setjið á fat í ofn í 4-6 mínútur við 160°C
- Steikið lauk og engifer í olíu í þykkbotna potti, án þess að brúna. Bætið safanum af ávöxtunum út í og látið sjóða smástund. Þá er rjómanum bætt í látið sjóða rólega í nokkrar mínútur. Smakkað til með salti og pipar. Takið sósuna af hitanum þannig að hætti að sjóða og þeytið kalt smjörið saman við í litlum bitum. Sósan má ekki sjóða aftur, ellegar er hætta á að smjörið skilji sig frá sósunni.
- Berið fiskinn fram með sósunni, soðnum smjörsteiktum kartöflum og snöggsoðnum sykurbaunum og gulrótarstrimlum.
Njótið með Allouchery-Perseval Tradition Blanc de Noirs Extra Brut!